തകർന്ന വീടും രോഗിയായ മകളും; കരഞ്ഞു കണ്ണുനീർ വറ്റി ഒരമ്മ

തകർന്ന വീട്ടിൽ മാനസിക വളർച്ചയില്ലാത്ത അപസ്മാര രോഗിയായ മകളുമൊത്ത് ആരും ആശ്രയമില്ലാതെ കഴിയുകയാണ് പാവറട്ടി പുതുമനശേരിയിൽ ഒരമ്മ. പഞ്ചായത്തിലെ പതിനഞ്ചാം വാർഡിൽ കൈരളി റോ‍ഡ് പരിസരത്ത് കഴിയുന്ന കുളങ്ങര വീട്ടിൽ പരേതനായ ഹംസയുടെ ഭാര്യ സുലൈഖയ്ക്കാണ് (60) ഈ ദുരിതം. രണ്ടര വയസിൽ പനി വന്നതിനെ തുടർന്ന് മാനസിക വളർച്ച മുരടിച്ച ഇളയ മകൾ ഫൗസിയയാണ് ഈ അമ്മയുടെ ഏറ്റവും വലിയ ദുഃഖം. ഇപ്പോൾ 32 വയസായ മകൾക്ക് അപസ്മാര രോഗവുമുണ്ട്.

കാൻസർ ബാധിച്ച് ചികിത്സയിലായിരുന്ന ഭർത്താവ് മരണപ്പെട്ടതോടെ കുടുംബഭാരം മുഴുവൻ സുലൈഖയുടെ തലയിലായി. നാല് പെൺകുട്ടികളിൽ മൂന്നു പേരെ വിവാഹം കഴിപ്പിച്ചു. വിവാഹിതരായ രണ്ട് ആൺമക്കൾ സുലൈഖയെയും രോഗിയായ സഹോദരിയെയും ശ്രദ്ധിക്കാതെ വേറെ താമസമാക്കിയതോടെയാണ് ഇവർക്ക് ആശ്രയമില്ലാതായത്. കെട്ടിച്ചയച്ച മൂന്നു പെൺകുട്ടികൾ ഇടയ്ക്ക് വരുമെങ്കിലും മൂന്നു പേരും പ്രാരബ്ധമുള്ളവരാണ്. ആൺമക്കൾ നോക്കാതായതോടെ രോഗിയായ മകളുടെ കാര്യം തന്റെ കാലശേഷം എന്താകുമെന്ന ആകുലതയിലാണ് സുലൈഖ.

ഭയം വർധിച്ചതോടെ ഈ അമ്മയ്ക്ക് ഇപ്പോൾ ഇല്ലാത്ത അസുഖങ്ങളില്ല. ഓടിട്ട വീടിന്റെ മേൽക്കൂരയെല്ലാം തകർന്ന് ചോർന്നൊലിക്കുന്ന അവസ്ഥയാണ്. എന്തെങ്കിലും അസുഖം വന്നാൽ കൊണ്ടുപോകാൻ വഴിപോലും ഇവർക്കില്ല. മൂന്ന് അടി വീതിയിലുള്ള വഴിയിലൂടെ തിങ്ങി ഞെരുങ്ങി ഏകദേശം നൂറു മീറ്റർ നടന്ന് വേണം റോഡിലെത്താൻ. ഇടവഴിയുടെ രണ്ട് വശത്തും സ്നേഹമതിലാണ്.സുലൈഖയ്ക്ക് ലഭിക്കുന്ന വിധവ പെൻഷനാണ് ഈ കുടുംബത്തിന്റെ ഏക വരുമാനം. അയൽവാസികൾ സഹായവുമായി ഇടയ്ക്ക് എത്തും. ഭർത്താവിന്റെ ചികിത്സയ്ക്കായി സ്ഥലത്തിന്റെ ആധാരം പാവറട്ടി സഹകരണ ബാങ്കിൽ പണയത്തിലാണ്. കരയാൻ മാത്രമേ ഈ അമ്മയ്ക്ക് അറിയൂ."


news and photo : manorama