ecAdemz

പാവറട്ടി സെന്ററിലെ ഉൾപ്പെടെ തെരുവുവിളക്കുകൾ ഒരു മാസമായി കത്തുന്നില്ല. കാറ്റിലും മഴയിലുമാണ് സെൻററിലെ തെരുവുവിളക്കുകൾ തകരാറിലായത്. രാത്രിയിൽ സെൻറർ ഉൾപ്പെടെയുള്ള ഭാഗങ്ങൾ ഇരുട്ടിലാണ്. കടകളിൽനിന്നുള്ള വെളിച്ചത്തിലാണ് കാൽനടയാത്രക്കാർ ഉൾപ്പെടെയുള്ളവരുടെ യാത്ര. തെരുവുവിളക്കുകൾ കത്തുന്നില്ലെന്ന് പഞ്ചായത്ത് അധികൃതരോട് പരാതി പറഞ്ഞെങ്കിലും നടപടി എടുത്തിട്ടില്ല.

ചിറ്റാട്ടുകര സെലിബ്രേഷൻ കമ്മിറ്റി സംഘടിപ്പിച്ച മെഗാ തെരുവോര ചിത്രരചന കേരള കലാമണ്ഡലം എക്സിക്യൂട്ടീവ് മെമ്പർ ശ്രീ.ടികെ.വാസു ഉദ്ഘാടനം ചെയ്തു.

വണ്‍ മില്ല്യണ്‍ ഗോള്‍ ക്യമ്പയിന്‍ പാവറട്ടി സെന്‍റ് ജോസഫ് സ്കൂളില്‍ പാവറട്ടി ഗ്രാമപഞ്ചായത്ത് പ്രസിഡന്‍റ് ശ്രീ.എന്‍.പി കാദര്‍മോന്‍ ഗോള്‍ അടിച്ചു ഉദ്ഘാടനം ചെയതു.പാവറട്ടി ഗ്രാപഞ്ചായത്ത് യൂത്ത് കോര്‍ഡിനേറ്റര്‍ ശ്രീ.റഫീഖ് വെന്മേനാട് നേതൃത്വം നല്കി. സെന്‍റ് ജോസഫ് സ്കൂള്‍ മാനേജര്‍ ഫാ.ജോസ് ചിറ്റിലപ്പിള്ളിയും ഗോള്‍ അടിച്ചു

പൊലീസ് സ്റ്റേഷൻ പരിധിയിൽ ബൈക്കിലെത്തി വീട്ടമ്മമാരുടെ മാലകവർച്ച നടത്തുന്നതു പതിവായി. ഒന്നര മാസത്തിനുള്ളിൽ നാലു പേരുടെ മാലയാണു കവർന്നത്. കഴി‍ഞ്ഞ മാസം ആദ്യം വെങ്കിടങ്ങ് കുഴുപ്പുള്ളി റോഡിൽ ബാങ്കിൽ പോയി മടങ്ങുകയായിരുന്ന റിട്ട. അധ്യാപിക തലക്കോട്ടുകര റപ്പായിയുടെ ഭാര്യ ത്രേസ്യയുടെ അഞ്ചു പവന്റെ മാലയാണു പൊട്ടിച്ചത്. ഒരു മാസം മുൻപു മുല്ലശേരി താണവീഥി സെന്റ് റീത്ത കപ്പേളയ്ക്കു സമീപം വെങ്കിടങ്ങ് സ്വദേശി കാഞ്ഞിരത്തിങ്കൽ ആൻഡ്രൂസിന്റെ ഭാര്യ ട്രീസയുടെ രണ്ടു പവന്റെ മാലയാണു പൊട്ടിച്ചത്.

മകളുടെ വീട്ടിൽ പോയി മടങ്ങുകയായിരുന്നു ട്രീസ. കഴിഞ്ഞ 16നു തൊയക്കാവ് മഞ്ചറമ്പത്ത് കുടുംബക്ഷേത്രത്തിൽ പോയി മടങ്ങുകയായിരുന്ന മണത്തല സ്വദേശി മഞ്ചറമ്പത്ത് വേലായുധന്റെ ഭാര്യ മണിയുടെ രണ്ടു പവന്റെ മാലയും കരുവന്തലയിൽ വച്ച് ബൈക്കിലെത്തിയ മോഷ്ടാക്കൾ കവർന്നു. പത്തു ദിവസം കഴിയുമ്പോഴേക്കാണ് ഇന്നലെ മുല്ലശേരി കനാൽ ബണ്ട് റോഡിൽ അടിയാറെ ലിപിന്റെ ഭാര്യ നീതുവിന്റെ ആറു പവന്റെ മാല കവർന്നത്.

എല്ലാ കവർച്ചയും വീട്ടമ്മമാരുടെ കഴുത്തിനടിച്ചു വീഴ്ത്തിയാണു നടന്നിട്ടുള്ളത്. തുടർച്ചയായുള്ള കവർച്ചകളിൽ ആരേയും പിടികൂടാൻ പൊലീസിനു കഴിഞ്ഞിട്ടില്ല. കഴിഞ്ഞ 16നു കരുവന്തലയിൽ നടന്ന കവർച്ചയ്ക്കു പിന്നാലെയാണു മുല്ലശേരി മാനിനകുന്നിൽ പെൺസുഹൃത്തുമായി സംസാരിച്ചു നിന്ന വിനായകിനെ പൊലീസ് കസ്റ്റഡിയിൽ എടുത്തത്. ബൈക്കിന്റെ രേഖ ശരിയല്ലാത്തതുമൂലമാണു വിനായകിനെ പൊലീസ് കസ്റ്റഡിയിലെടുത്തതെങ്കിലും മാലമോഷണം തലയിൽ കെട്ടിവയ്ക്കാൻ ശ്രമിച്ചതായി ആരോപണം ഉയർന്നു. കസ്റ്റഡിയിൽനിന്നു വിട്ടയച്ച വിനായക് ജീവനൊടുക്കിയതോടെ സംഭവം വിവാദമായി.

പാവറട്ടി ശുദ്ധജല വിതരണ പദ്ധതിയില്‍ പുതുതായി രണ്ടു പഞ്ചായത്തുകളെക്കൂടി ഉള്‍പ്പെടുത്തിക്കൊണ്ടുള്ള നിര്‍മാണ പ്രവര്‍ത്തനങ്ങള്‍ക്ക് തൃത്താലയില്‍ തുടക്കമായി. 17.25 കോടിയുടെ പ്രവര്‍ത്തനങ്ങളാണ് നടത്തുന്നത്. കേന്ദ്രാവിഷ്‌കൃത പദ്ധതിയില്‍പ്പെടുത്തിയുള്ള വികസനപ്രവര്‍ത്തനങ്ങളാണ് നടക്കുന്നത്. പാവറട്ടി, മുല്ലശ്ശേരി പഞ്ചായത്തുകളെക്കൂടി ഉള്‍പ്പെടുത്തിയാണ് പദ്ധതി വിപുലീകരിക്കുന്നത്.

10.35 കോടിയുടെ ശുദ്ധജല സംഭരണ പ്ലാന്റും ഭാരതപ്പുഴയില്‍ രണ്ടുകോടി രൂപയ്ക്ക് കിണര്‍ നിര്‍മാണവുമാണ് നടക്കുന്നത്. 2045ലെ ശുദ്ധജല ആവശ്യകത മുന്‍കൂട്ടിക്കണ്ടുള്ള നിര്‍മാണമാണ് നടക്കുന്നത്. 2018 ഡിസംബര്‍ 3-നുള്ളില്‍ പൂര്‍ത്തീകരിക്കുന്ന പദ്ധതിയിലൂടെ പ്രതിദിനം 33 ദശലക്ഷം ലിറ്റര്‍ ശുദ്ധജലം 12 പഞ്ചായത്തുകളിലായി വിതരണം ചെയ്യും.

3.22 ലക്ഷം ഉപഭോക്താക്കള്‍ക്ക് മുടങ്ങാതെ വെള്ളം നല്‍കാന്‍ കഴിവുള്ളതാണ് പദ്ധതി. തൃത്താലയിലെ മുടവന്നൂരിലാണ് ശുദ്ധീകരണശാല പണിയുന്നത്. 33 ദശലക്ഷം ലിറ്റര്‍ വെള്ളമാണ് പ്രതിദിനം ശുദ്ധീകരിക്കുന്നത്. 600 കുതിരശക്തിയുടെ രണ്ടു മോട്ടോറുകളാണ് പ്ലാന്റിനുള്ളില്‍ സ്ഥാപിക്കുക. മോട്ടോറുകള്‍ പ്രവര്‍ത്തിപ്പിക്കാനുള്ള 750 കെ.വി.എ. സബ്‌സ്റ്റേഷനും ട്രാന്‍സ്‌ഫോര്‍മറും സ്ഥാപിക്കും.

നിലവില്‍ പതിനഞ്ചു ദശലക്ഷം ലിറ്റര്‍ വെള്ളമാണ് പദ്ധതി വഴി വിതരണം ചെയ്യുന്നത്. തൃശ്ശൂര്‍ ജില്ലയില്‍ ആറും പാലക്കാട് നാലും പഞ്ചായത്തുകളിലാണ് പാവറട്ടി പദ്ധതിയിലൂടെ വെള്ളം നല്‍കുന്നത്. മൂന്നും നാലും ദിവസങ്ങള്‍ ഇടവിട്ടാണ് പദ്ധതി വഴി വെള്ളം നല്‍കുന്നത്. വികസനപ്രവര്‍ത്തനങ്ങള്‍ പൂര്‍ത്തിയാകുന്നതോടെ പാവറട്ടി പദ്ധതി വഴിയുള്ള ശുദ്ധജലവിതരണം മുടങ്ങാതെ നടക്കും.


Photo http://www.mathrubhumi.com

അമല ആസ്പത്രിയുടെ സ്ഥാപക ഡയറക്ടറും ഇരിങ്ങാലക്കുട ക്രൈസ്റ്റ് കോളേജുള്‍പ്പെടെ നിരവധി വിദ്യാഭ്യാസപ്രസ്ഥാനങ്ങള്‍ ആരംഭിക്കുകയും ചെയ്ത ഫാ. ഗബ്രിയേല്‍ ചിറമല്‍ അന്തരിച്ചു. 103 വയസ്സായിരുന്നു.

വ്യാഴാഴ്ച വൈകീട്ട് ആറരയോടെ അമലയിലെ അമലഭവനിലായിരുന്നു അന്ത്യം. 2007ല്‍ രാജ്യം പദ്മഭൂഷണ്‍ നല്‍കി ആദരിച്ചിരുന്നു. 

വിദ്യാഭ്യാസവിചക്ഷണന്‍, അധ്യാപകന്‍, സംഘാടകന്‍, പൊതുപ്രവര്‍ത്തകന്‍ തുടങ്ങി ഏതു വിശേഷണവും ഇണങ്ങുന്നയാളായിരുന്നു. ചാലക്കുടി കാര്‍മല്‍ ഇംഗ്ലീഷ് മീഡിയം സ്‌കൂള്‍, പാലക്കാട് ഭാരതമാതാ സ്‌കൂള്‍, കോഴിക്കോട് ദീപ്തിഭവന്‍, ഇരിങ്ങാലക്കുട സെന്റ് ജോസഫ്സ് കോളേജ്, ഇരിങ്ങാലക്കുട കാത്തലിക് സെന്റര്‍ എന്നിവയുടെ പിറവിയിലും മുഖ്യപങ്കുവഹിച്ചു.
സി.എം.െഎ. സഭാംഗമാണ്. ലോകത്തില്‍ത്തന്നെ ഏറ്റവുമധികം കുര്‍ബാനയര്‍പ്പിച്ചിട്ടുള്ള വൈദികരില്‍ ഒരാളാണ്.

1914 ഡിസംബര്‍ 11ന് മണലൂരിലാണ് ജനനം. 1942 മേയ് 30ന് വൈദികപട്ടം ലഭിച്ചു. ചമ്പക്കുളം യു.പി. സ്‌കൂളില്‍ അധ്യാപകനായി. 1943ല്‍ അധ്യാപനം മാന്നാനത്തേക്കു മാറ്റി. ചങ്ങനാശ്ശേരി എസ്.ബി. കോളേജില്‍നിന്ന് ഒന്നാം റാങ്കോടെ ഇന്റര്‍മീഡിയറ്റ് വിജയിച്ചു. ബി.എ. ഓണേഴ്സ് മദ്രാസ് പ്രസിഡന്‍സി കോളേജില്‍നിന്ന് രണ്ടാംറാങ്കോടെയാണ് പാസായത്. തുടര്‍ന്ന് തേവര സേക്രഡ് ഹാര്‍ട്ട് കോളേജില്‍ അധ്യാപകനായി. ഇവിടെ പഠിപ്പിച്ചിരുന്ന കാലത്താണ് കപ്പലുകളെ ആക്രമിക്കുന്ന സമുദ്രജീവികളെ അദ്ദേഹം കണ്ടെത്തിയത്. പിന്നീട് ശാസ്ത്രകാരന്മാര്‍ ഇതിന് 'ബാന്‍കിയ ഗബ്രിയേലി' എന്നു പേരിട്ടു.

ക്രൈസ്റ്റ് കോളേജിന്റെ ആദ്യ പ്രിന്‍സിപ്പലായ അദ്ദേഹം 1956 മുതല്‍ 1975 വരെ ഈ പദവിയില്‍ തുടര്‍ന്നു. ഇവിടെനിന്ന് വിരമിച്ചശേഷം ദേവമാതാ പ്രോവിന്‍സിന്റെ പ്രൊവിന്‍ഷ്യാളായി പ്രവര്‍ത്തിച്ചു. ഇക്കാലത്താണ് അമല ആസ്പത്രി ആരംഭിച്ചത്. 1978ലായിരുന്നു ഇത്.

ശവസംസ്‌കാരം ശനിയാഴ്ച രണ്ടുമണിക്ക് ഇരിങ്ങാലക്കുട ക്രൈസ്റ്റ് ആശ്രമദേവാലയത്തില്‍ നടക്കും. വെള്ളിയാഴ്ച രാവിലെ ആറുമണിക്ക് അമല ആസ്പത്രി ചാപ്പലില്‍ പൊതുദര്‍ശനത്തിന് വെയ്ക്കും. ആദരാഞ്ജലി അര്‍പ്പിക്കാന്‍ ശനിയാഴ്ച രാവിലെ ഒമ്പതുവരെ ഇവിടെ സൗകര്യമുണ്ടാകും. ശനിയാഴ്ച രാവിലെ പത്തരമുതല്‍ ക്രൈസ്റ്റ് കോളേജില്‍ പൊതുദര്‍ശനത്തിന് വെയ്ക്കും.

മനപ്പടിയില്‍ തെരുവുനായ്ക്കള്‍ വളര്‍ത്തുകോഴികളെ കടിച്ചുകൊന്നു. കാക്രാട്ട് റോഡില്‍ ചിറ്റിലപ്പിള്ളി പത്രോസ് ജോസിന്റെ വീട്ടിലെ ഇരുപതോളം വരുന്ന കോഴികളെയാണ് കൂടുപൊളിച്ച് കടിച്ചുകൊന്നത്. തിങ്കളാഴ്ച രാത്രിയിലാണ് സംഭവം.

ശബ്ദംകേട്ട് സമീപവാസികളും വീട്ടുകാരും ഓടിയെത്തുമ്പോഴേക്കും കോഴികളെല്ലാം ചത്തു. ബാക്കിയുള്ളവയെ കടിച്ചുകൊണ്ടുപോകുകയും ചെയ്തു. ജോസ് ഉപജീവനമാര്‍ഗമായാണ് കോഴികളെ വളര്‍ത്തിയിരുന്നത്. മുമ്പും കൂട് പൊളിച്ച് തെരുവുനായ്ക്കള്‍ കോഴികളെ കടിച്ചുകൊന്നിട്ടുണ്ട്.

ഏഴാം വാര്‍ഡിലുള്‍പ്പെട്ട മനപ്പടി, വി.ബി.എസ്. ഹാള്‍ പരിസരം, കക്രാട്ട്‌റോഡ് എന്നീ ഭാഗങ്ങളില്‍ തെരുവുനായ്ശല്യം രൂക്ഷമായതായി നാട്ടുകാര്‍ പറഞ്ഞു.

തൃശൂർ റെയിൽവേ സ്റ്റേഷനിലെത്തുന്നവർക്ക് ഇനി സൗജന്യ വൈ–ഫൈ സൗകര്യം. രണ്ടാം പ്ലാറ്റ്ഫോമിൽനിന്നു മുകളിലേക്കു കയറാൻ എസ്കലേറ്റർ. ഹൈടെക് സൗകര്യങ്ങളുടെ ഉദ്ഘാടനം വീഡിയോ കോൺഫറൻസിംഗ് വഴി കേന്ദ്ര റെയിൽവേ മന്ത്രി സുരേഷ് പ്രഭു ഉദ്ഘാടനം ചെയ്തു.

തൃശൂർ റെയിൽവേ സ്റ്റേഷനിൽ നടന്ന ചടങ്ങിൽ മേയർ അജിത ജയരാജൻ, ജില്ലാ പഞ്ചായത്ത് പ്രസിഡന്റ് ഷീല വിജയകുമാർ എന്നിവർ എസ്കലേറ്ററിൽ കയറിയാണ് ഉദ്ഘാടനം നിർവഹിച്ചത്. തിരുവനന്തപുരം ഡിവിഷൻ അഡീഷണൽ ഡിവിഷണൽ റെയിൽവേ മാനേജർ കെ.എസ്.ജയിൻ, സ്റ്റേഷൻ മാനേജർ ജോസഫ് നൈനാൻ തുടങ്ങിയവർ പങ്കെടുത്തു.

തൃശൂർ, തിരുവനന്തപുരം, പാലക്കാട് സ്റ്റേഷനുകൾ കോഴിക്കോടുമായി ബന്ധപ്പെടുത്തി റെയിൽ ടെല്ലിന്റെ എച്ച്ഡി വീഡിയോ കോൺഫറൻസിംഗ് സൗകര്യം ഉപയോഗിച്ചായിരുന്നു ഉദ്ഘാടന ചടങ്ങ് സംഘടിപ്പിച്ചിരുന്നത്.

റെയിൽവേ സ്റ്റേഷനിലെത്തുന്ന യാത്രക്കാർക്കും ഇതുവഴി കടന്നു പോകുന്നവർക്കും വൈ–ഫൈ സൗകര്യം ഉപയോഗിച്ച് ഒരു ഉയർന്ന എച്ച്ഡി വീഡിയോ, ഒരു പുസ്തകം അല്ലെങ്കിൽ ഒരു പുതിയ ഗെയിം ഡൗൺലോഡ് ചെയ്യാൻ സാധിക്കും.

പ്രതിദിനം 20,000 യാത്രക്കാർ എത്തുന്ന സ്റ്റേഷനാണ് തൃശൂർ. യാത്രക്കാർക്കു വൈ–ഫൈ സേവനം നൽകുന്നത് റെയിൽ വയർ എന്ന റെയിൽ ടെല്ലിന്റെ ബ്രോഡ് ബാൻഡ് സേവനമാണ്. യാത്രക്കാർക്ക് ഏറ്റവും മികച്ച രീതിയിലുള്ള ഇന്റർനെറ്റ് സൗകര്യം ലഭ്യമാക്കുന്ന രീതിയിലാണ് രൂപകല്പന ചെയ്തിരിക്കുന്നതെന്ന് അധികൃതർ വ്യക്‌തമാക്കി.

റെയിൽവേ സ്റ്റേഷനിൽ നിർമാണത്തിലിരക്കുന്ന ലിഫ്റ്റിന്റെ ഉദ്ഘാടനം മൂന്നു മാസത്തിനുള്ളിൽ നടത്തുമെന്നു സ്റ്റേഷൻ മാനേജർ ജോസഫ് നൈനാൻ പറഞ്ഞു. നിർമാണ ജോലികൾ അതിവേഗം പുരോഗമിക്കുകയാണ്. എസ്കലേറ്ററിന്റെ നിർമാണം പൂർത്തിയാക്കാനുള്ളതും എത്രയും വേഗം തുടങ്ങാനാകുമെന്ന പ്രതീക്ഷയിലാണ്

സെന്റ് ജോസഫ്സ് തീർഥകേന്ദ്രത്തിൽ ഓണാഘോഷങ്ങളോടനുബന്ധിച്ചു വടംവലിയും പൂക്കള മൽസരവും ഇന്ന് അരങ്ങേറും. സിഎൽസിയാണു വടംവലി സംഘടിപ്പിക്കുന്നത്. കെസിവൈഎമ്മിന്റെ നേതൃത്വത്തിലാണു പൂക്കള മൽസരം. രാവിലെ ഒൻപതിനു തീർഥകേന്ദ്രം വികാരി ഫാ. ജോൺസൺ അരിമ്പൂർ ഉദ്ഘാടനം ചെയ്യും

തൈക്കാട് ബ്രഹ്മകുളം സെന്റ് തോമസ് പള്ളിക്കും കപ്പേളയ്ക്കും നേരെ ആക്രമണമുണ്ടായി.


ജനല്‍ ചില്ലുകള്‍ തകര്‍ത്തിട്ടുണ്ട്. പള്ളിയുടെ നടവാതിലിനടുത്തുള്ള നോട്ടീസ് ബോര്‍ഡുകള്‍ എറിഞ്ഞു തകര്‍ത്തനിലയിലാണ്. സംഭവവുമായി ബന്ധപ്പെട്ട് തൈക്കാട് പാന്തറയില്‍ വിവേകിനെ (25) പോലീസ് അറസ്റ്റുചെയ്തു. ഇയാള്‍ മനോദൗര്‍ബല്യമുള്ളയാളാണെന്ന് പോലീസ് പറഞ്ഞു.

പള്ളിയുടെ ഷോപ്പിങ് കോംപ്ലക്‌സിനു മുന്നില്‍ നിര്‍ത്തിയിട്ടിരുന്ന വാഴപ്പിള്ളി ഫ്രാന്‍സിസ് ബേബിയുടെ കാര്‍, തൈക്കാട് കപ്പേളയ്ക്കു സമീപം പുലിക്കോട്ടില്‍ ബാബുവിന്റെ ഓട്ടോറിക്ഷ എന്നിവയ്ക്കുനേരെയും അക്രമം ഉണ്ടായി. വാഹനങ്ങളുടെ ചില്ലുകള്‍ തകര്‍ന്നു.

ബുധനാഴ്ച പുലര്‍ച്ചെ അഞ്ചരയോടെയാണ് സംഭവം. പള്ളിയിലെ കപ്യാരെ കണ്ടപ്പോള്‍ യുവാവ് ബൈക്കെടുത്ത് പോയി. ബൈക്കില്‍ വന്ന് യുവാവ് അക്രമം നടത്തുന്ന ദൃശ്യം പള്ളിയുടെ സി.സി.ടി.വി. കാമറയില്‍ പതിഞ്ഞിട്ടുണ്ട്.

ഗുരുവായൂര്‍ സി.ഐ. കൃഷ്ണന്‍, എസ്.ഐ. സുരേഷ്, സ്റ്റേറ്റ് സ്‌പെഷല്‍ ബ്രാഞ്ച് എസ്.ഐ.മാരായ മണലൂര്‍ ഗോപിനാഥന്‍, മുരളി എന്നിവര്‍ പള്ളിയിലെത്തി പരിശോധന നടത്തി.