ecAdemz

സെന്റ് സെബാസ്റ്റ്യൻസ് പള്ളിയിലെ കമ്പിടി തിരുനാൾ ആഘോഷത്തിന് എല്ലാ വീടുകളിലും സ്വന്തമായി വിഷരഹിത ജൈവ പച്ചക്കറി എന്ന ആശയവുമായി ഇടവകയിലാകെ അടുക്കളത്തോട്ടം പദ്ധതി തുടങ്ങി. കൃഷിഭവനുമായി സഹകരിച്ച് ഇടവകയിലെ 850 വീടുകളിലാണ് അടുക്കളത്തോട്ടം ഉണ്ടാക്കുന്നത്. ജനുവരി ആറ്, ഏഴ് തീയതികളിലാണ് തിരുനാൾ ആഘോഷം. ഇതിന് മുൻപ് വിളവെടുപ്പ് നടത്താൻ പാകത്തിലാണ് കൃഷി ക്രമീകരിച്ചിട്ടുള്ളത്. ഇതിനുള്ള നടീൽ വസ്തുക്കളും വിത്തുകളും ഇടവകയിൽ വിതരണം ചെയ്തു.

പയർ, വെണ്ട, മുളക്, വഴുതിന എന്നിവയാണ് ആദ്യഘട്ടത്തിൽ കൃഷി ചെയ്യുന്നത്. വിളവെടുത്ത ഉൽപന്നങ്ങൾ തിരുനാൾ ദിവസങ്ങളിൽ പള്ളിയിലെത്തിക്കും. കൃഷി വകുപ്പിന്റെ അമ്പ് എഴുന്നള്ളിപ്പ് നടക്കുന്ന ദിവസം ഉൽപന്നങ്ങൾ ലേലം ചെയ്യും. ഇടവക അടുക്കളത്തോട്ടം പദ്ധതി വികാരി ഫാ. റാഫേൽ വടക്കൻ ഉദ്ഘാടനം ചെയ്തു. ഫാ. നവീൻ മുരിങ്ങാത്തേരി അധ്യക്ഷനായി.

എളവള്ളി പഞ്ചായത്ത് പ്രസിഡന്റ് യു.കെ.ലതിക നടീൽ വസ്തുക്കളുടെ വിതരണം നടത്തി. ട്രസ്റ്റിമാരായ ജോസ് മാത്യു, ബെന്നി പോൾ, ജനറൽ കൺവീനർ വർഗീസ് മാനത്തിൽ, ജോയിന്റ് ജനറൽ കൺവീനർ പി.ഡി.ജോസ്, പ്രോഗ്രാം കോ–ഓർഡിനേറ്റർ സി.ജെ.സ്റ്റാൻലി, ലിസി വർഗീസ്, ജസ്റ്റിൻ തോമസ്, ഷിന്റോ തരകൻ, റാണി ജോർജ് എന്നിവർ പ്രസംഗിച്ചു. വി.എ.സോജൻ, ആലീസ് ഫ്രാൻസിസ്, നിമ്മി ജൂണി എന്നിവർ പരിപാടികൾക്ക് നേതൃത്വം നൽകി.

News : manorama

പാവറട്ടി കൃഷിഭവൻ മുഖേന പച്ചക്കറി കൃഷി വികസന പദ്ധതി പ്രകാരം ക്ലസ്റ്റർ അടിസ്ഥാനത്തിൽ പച്ചക്കറി കൃഷി ചെയ്യുന്നതിനും പോഷക വിള ഇൻഷുറൻസ് കിറ്റ് ലഭിക്കുന്നതിനും തരിശുനിലം കൃഷി ചെയ്യുന്നതിനും കരനെൽകൃഷിക്ക് സഹായധനം ലഭിക്കുന്നതിനും ഉടൻ അപേക്ഷ സമർപ്പിക്കണം ചെണ്ടുമല്ലി കൃഷിക്കുള്ള തൈകൾ, രക്തശാലി നെൽവിത്ത് എന്നിവ ആവശ്യമുള്ളവർ 28നകം കൃഷിഭവനിൽ പേരു റജിസ്റ്റർ ചെയ്യണം.

പെരിങ്ങാട് ഗ്രാമത്തിൽ കേന്ദ്രസർക്കാരിന്റെ ഗ്രീൻ ഇന്ത്യ മിഷൻ പദ്ധതി നടപ്പിലാക്കും. കാലാവസ്‌ഥ വ്യതിയാനത്തെയും ആഗോളതാപനത്തെയും അതുമൂലമുണ്ടാകുന്ന പാരിസ്‌ഥിതിക ദുരന്തങ്ങളെയും അതിജീവിക്കുക എന്ന ലക്ഷ്യത്തോടെയാണ് കേന്ദ്രസർക്കാർ ഹരിതഭാരത ദൗത്യം പദ്ധതി നടപ്പിലാക്കുന്നത്.

അഞ്ച് വർഷംകൊണ്ട് പൂർത്തീകരിക്കുന്ന ഈ പദ്ധതിക്ക് മുല്ലശേരി ബ്ലോക്ക് പഞ്ചായത്തിൽനിന്നും തെരഞ്ഞെടുത്ത ഏക ഗ്രാമമാണ് പെരിങ്ങാട്. ജില്ലാ സമൂഹ്യ വനവൽക്കരണ വിഭാഗത്തിന്റെ നേതൃത്വത്തിൽ പെരിങ്ങാട് ഗ്രാമഹരിത സമിതിയുടെ സഹകരണത്തോടെയാണ് പദ്ധതി നടപ്പിലാക്കുക. ചുക്കുബസാർ സെന്ററിൽ പദ്ധതിയുടെ സൂക്ഷ്മാസൂത്രണ രൂപരേഖ തയാറാക്കുന്നതിന് ചേർന്ന പങ്കാളിത്ത ഗ്രാമ വിശകലന യോഗം പാവറട്ടി ഗ്രാമപഞ്ചായത്ത് പ്രസിഡന്റ് എൻ.പി.കാദർമോൻ ഉദ്ഘാടനം ചെയ്തു

പാവറട്ടി സെന്റ് ജോസഫ്‌സ് തീര്‍ത്ഥകേന്ദ്രത്തില്‍ വിശ്വാസികള്‍ക്ക് പ്രചോദനമേകാന്‍ ജൈവകൃഷി.

തീര്‍ത്ഥകേന്ദ്രത്തിനോട് ചേര്‍ന്നുള്ള ഒരേക്കറോളം ഭൂമിയിലാണ് 'ഹരിതം അമൃതം' എന്ന പേരില്‍ ജൈവകൃഷി ചെയ്യുന്നത്. പാവറട്ടി കൃഷിഭവന്റെ സഹകരണത്തോടെയാണ് പദ്ധതി നടപ്പാക്കുന്നത്.

തീര്‍ത്ഥകേന്ദ്രം വികാരി ഫാ.ജോണ്‍സണ്‍ അരിമ്പൂരിന്റെ നേതൃത്വത്തില്‍ കൂര്‍ക്ക, പടവലം, പാവയ്ക്ക, പയര്‍, വെണ്ട, നേന്ത്രവാഴ തുടങ്ങിയവയാണ് പ്രധാനമായും കൃഷി ചെയ്യുന്നത്. ജലം പാഴാക്കാതെ സൂക്ഷ്മ ജലസേചന സംവിധാനമാണ് ഒരുക്കിയിട്ടുള്ളത്. ചാണകവും ഗോമൂത്രവും ഉപയോഗിച്ചുള്ള മിശ്രിത വളപ്രയോഗമാണ് ഉപയോഗിക്കുന്നത്. വിളവെടുക്കുന്ന പച്ചക്കറി വിശ്വാസികള്‍ക്ക് തന്നെ ലേലം ചെയ്യും.

 വിളവെടുപ്പ് ഗ്രാമപ്പഞ്ചായത്ത് വൈസ് പ്രസിഡന്റ് മിനി ലിയോ ഉദ്ഘാടനം ചെയ്തു. വികാരി ഫാ. ജോണ്‍സണ്‍ അരിമ്പൂര്‍ അധ്യക്ഷനായി. അസി.വികാരി ഫാ. സജ്ജയ് തൈക്കാട്ടില്‍, കൃഷി ഓഫീസര്‍ കെ.ബിന്ദു, ട്രസ്റ്റിമാരായ സി.പി. തോമസ്, ഇ.ജെ.ടി. ദാസ്, ടി.ടി. ജോസ്, ബോസ് ആന്റണി എന്നിവര്‍ പ്രസംഗിച്ചു.

രണ്ട് ഹര്‍ത്താലുകള്‍ അടുപ്പിച്ചുലഭിച്ചപ്പോള്‍ പാഴ്‌നിലം കൃഷിയിടമായി മാറി. വിളക്കാട്ടുപാടം ദേവസൂര്യ കലാവേദി പ്രവര്‍ത്തകരാണ് ഹര്‍ത്താല്‍ ഒഴിവുകള്‍ പാഴാക്കാതെ കൃഷിയിടമൊരുക്കിയത്.

പാട്ടത്തിനെടുത്ത സ്ഥലത്ത് ജൈവകൃഷി ചെയ്യാനാണ് ഇവരുടെ ഉദ്ദേശ്യം. ഹര്‍ത്താല്‍ ദിനങ്ങളില്‍, കാടുപിടിച്ചുനടന്ന സ്ഥലം യന്ത്രസഹായമില്ലാതെ വെട്ടി വൃത്തിയാക്കി. നിലം കിളച്ച് ചാലുകീറി. മൂന്നുവര്‍ഷമായി മുടങ്ങാതെ ദേവസൂര്യ പ്രവര്‍ത്തകര്‍ ജൈവകൃഷി ചെയ്യുന്നുണ്ട്.

പരിസ്ഥിതി പ്രവര്‍ത്തകന്‍ സി.എഫ്. ജോര്‍ജ്, ദേവസൂര്യ അംഗങ്ങളായ കെ.സി. അഭിലാഷ്, ടി.കെ. സുനില്‍, റെജി വിളക്കാട്ടുപാടം, ടി.കെ. സുരേഷ് എന്നിവര്‍ പ്രവര്‍ത്തനങ്ങള്‍ക്ക് നേതൃത്വം നല്‍കി.

കാർഷിക ഉല്പന്നങ്ങളുടെ സംഭരണത്തിനും വിൽപ്പനയ്ക്കുമായി കേരളത്തിൽ പുതിയ 200 ഇക്കോ ഷോപ്പുകൾ ആരംഭിക്കുമെന്ന് കൃഷി മന്ത്രി വി.എസ്. സുനിൽകുമാർ പറഞ്ഞു.

 കേര കർഷക ഫെഡറേഷനും പാവറട്ടി കൃഷിഭവൻ വെജിറ്റബിൾ ക്ലസ്റ്ററും സംയുക്‌തമായി ആരംഭിച്ച കർഷക മിത്ര ബയോ ഫാർമസിയുടെ ഉദ്ഘാടനം നിർവഹിച്ച് സംസാരിക്കുകയായിരുന്നു മന്ത്രി. ശാസ്ത്രീയമായ മാർക്കറ്റിംഗ് സിസ്റ്റം കാർഷിക മേഖലയിൽ നടപ്പിലാക്കും. തരിശായ കിടക്കുന്ന 90,000 ഹെക്ടർ ഭൂമി പൂർണമായും കൃഷിയോഗ്യമാക്കും. നഷ്‌ടപ്പെട്ടുപോയികൊണ്ടിരിക്കുന്ന കാർഷിക സംസ്കാരം തിരിച്ചുകൊണ്ടുവരും. നാളികേര സംഭരണവുമായി ബന്ധപ്പെടുള്ള സാങ്കേതിക തടസങ്ങൾ നീക്കം ചെയ്യാനുള്ള നടപടികൾ പൂർത്തിയായാൽ സംഭരണവില 27 ആയി വർധിപ്പിക്കുമെന്നും കൃഷി മന്ത്രി കൂട്ടിച്ചേർത്തു.

മുരളി പെരുനെല്ലി എംഎൽഎ യോഗത്തിൽ അധ്യക്ഷനായിരുന്നു. പാവറട്ടി പഞ്ചായത്ത് പ്രസിഡന്റ് എൻ.പി. കാദർമോൻ, ബ്ലോക്ക് പഞ്ചായത്ത് പ്രസിഡന്റ് ലതി വേണുഗോപാൽ, ജില്ലാ കൃഷി ഓഫീസർ എ.എ. പ്രസാദ്, കൃഷി അസിസ്റ്റന്റ് ഡയറക്ടർ വി. സന്ധ്യ, കൃഷി ഓഫീസർ കെ. സിന്ധു, അഡ്വ. ജോബി ഡേവിസ്, കമാലുദ്ദീൻ തോപ്പിൽ, വി.കെ. അബ്ദുള്ളമോൻ, ത്രിതല പഞ്ചായത്ത് ജനപ്രതിനിധികൾ, വിവിധ രാഷ്ര്‌ടീയകക്ഷി നേതാക്കൾ തുടങ്ങിയവർ സംസാരിച്ചു.

40 വർഷങ്ങൾക്ക് ശേഷം വിളക്കാട്ടുപാടം വീണ്ടും കതിരണിഞ്ഞു. കൃഷി വകുപ്പിന്റെ കരകൃഷി പ്രോത്സാഹനത്തിലൂടെയാണ് ഇത് സാധ്യമായത്. 40 വർഷങ്ങൾക്ക് അപ്പുറം സമൃദ്ധമായി നെല്ല് വിളഞ്ഞിരുന്ന വിളക്കാട്ടുപാടം ഇന്ന് ഏറെക്കുറെ കരഭൂമിയായി മാറി കഴിഞ്ഞു. തൃശൂർ എൻജിനീയറിങ് കോളജിൽ നിന്നും കായിക അധ്യാപകനായി വിരമിച്ച പ്രഫ. എൻ.ജെ. വർഗീസാണ് ഒരേക്കറോളം വരുന്ന സ്വന്തം ഭൂമിയിൽ നെല്ല് വിളയിച്ച് വിളക്കാട്ടുപാടത്തിന്റെ പഴയ പ്രതാപത്തിലേക്ക് നയിച്ചത്.

 105 ദിവസമായ സ്വർണ പ്രഭയും 120 ദിവസമായ ജ്യോതി നെൽവിത്തുമാണ് കൃഷിയിറക്കിയിട്ടുള്ളത്. 65 ദിവസം പിന്നിട്ടും ജൈവ വളങ്ങളും ജൈവ കീടനാശിനികളും മാത്രമാണ് പ്രയോഗിക്കുന്നത്. നെൽകൃഷിക്ക് പുറമെ തക്കാളി, വെള്ളരി, വെണ്ട, പയർ, ചീര, വഴുതന, മുളക്, കൂർക്ക തുടങ്ങിയ ജൈവ പച്ചക്കറികളും വർഗീസ് കൃഷി ചെയ്യുന്നു. 

ജൈവ പച്ചക്കറിക്കൃഷി പ്രോത്സാഹിപ്പിക്കുന്നതിനായി ഗുരുവായൂർ നഗരസഭ ആരംഭിച്ച ‘നാട്ടുപച്ച’ പദ്ധതിയുടെ ഉദ്ഘാടനം നാളെ Sep അഞ്ചിന് നഗരസഭ ടൗൺഹാളിൽ മന്ത്രി വി.എസ്.സുനിൽകുമാർ നിർവഹിക്കും. കെ.വി.അബ്ദുൽഖാദർ എംഎൽഎ അധ്യക്ഷനാകും. മുരളി പെരുനെല്ലി എംഎൽഎ മുഖ്യാതിഥിയാകും. നാട്ടുപച്ചയോടനുബന്ധിച്ചുള്ള കാർഷിക പ്രദർശനം നാളെ ആരംഭിച്ച് എട്ടിന് സമാപിക്കും. ജൈവ കാർഷിക വിഭവങ്ങളുടെ പ്രദർശനം, അക്വാപോണിക്സ് കൃഷി, വെർട്ടിക്കൽ കൃഷി, കരനെല്ല് കൃഷി, 3000 ഗ്രോ ബാഗുകളിൽ പച്ചക്കറിക്കൃഷിയുടെ പ്രദർശനം, കലാപരിപാടികൾ എന്നിവ നടക്കും.

ബംഗളൂരുവിലെ മുന്തിരി തോട്ടങ്ങളില്‍ വിളഞ്ഞു നില്‍ക്കുന്നതുപോലെ വീട്ടിലെ ടെറസിന് മുകളില്‍ മുന്തിരി വിളയിക്കാമെന്ന് തെളിയിച്ചിരിക്കുകയാണ് ഗുരുവായൂര്‍ മേഴ്സി കോളജിലെ അധ്യാപികയായ രോഷ്നി. തന്‍റെ രണ്ടു വര്‍ഷത്തെ പരിശ്രമത്തിനൊടുവില്‍ 85കുല മുന്തിരിയാണ് ടെറസിലെ തോട്ടത്തില്‍ ഉണ്ടായത്.

 രണ്ടു വര്‍ഷം മുമ്പാണ് മറ്റു കൃഷികള്‍ക്കൊപ്പം രോഷ്നി മുന്തിരി കൃഷിയും തുടങ്ങിയത്. ടെറസിന് താഴെ മണ്ണില്‍ കുഴിച്ചിട്ട് വള്ളി ടെറസിലേക്ക് പടര്‍ത്തിയാണ് കൃഷി ചെയ്തത്. മഴമറ ഉപയോഗിച്ചായിരുന്നു മുന്തിരിയെ പരിപാലിച്ചത്. മഴയും വെയിലുമേല്‍ക്കാതെ രണ്ടുവര്‍ഷത്തോളം പരിപാലിച്ചു. ചാണകപ്പൊടി മാത്രമായിരുന്നു വളമായി ഉപയോഗിച്ചത്. കഴിഞ്ഞ വര്‍ഷം പൂത്തെങ്കിലും വിരലിലെണ്ണാവുന്ന കുലകള്‍ മാത്രമാണുണ്ടായത്. ഇത്തവണ 50കുലകളാണ് വിളവെടുത്ത് സുഹൃത്തുക്കള്‍ക്കും ബന്ധുക്കള്‍ക്കുമൊക്കെയായി നല്‍കിയത്.

അഞ്ചു വര്‍ഷം മുമ്പ് ജൈവ പച്ചക്കറി കൃഷിയിലൂടെയാണ് ടെറസിന് മുകളിലെ കൃഷിയുടെ തുടക്കം. ഇപ്പോള്‍ പച്ചക്കറികള്‍ക്ക് പുറമെ മാതള നാരങ്ങ, മധുര നാരങ്ങ, മൂസംബി, വാഴ എന്നിവയും വിളയുന്നുണ്ട്. വീട്ടിലാവശ്യമുള്ളതും സുഹൃത്തുക്കള്‍ക്ക് നല്‍കാനുമുള്ള ജൈവ പച്ചക്കറികള്‍ ഇവിടെനിന്ന് ലഭിക്കുന്നുണ്ട്. പൂക്കോട് മേഖലയിലെ മികച്ച കര്‍ഷക അവാര്‍ഡ് രോഷ്നിക്ക് ലഭിച്ചിട്ടുണ്ട്. കൃഷിയില്‍ സഹായത്തിന് ഭര്‍ത്താവ് മേഴ്സി കോളജിലെ പ്രിന്‍സിപ്പലായ സി.ടി. വിനോദിന്‍റെ പിന്തുണയും ഉണ്ട്. മുന്തിരി വള്ളികള്‍ തളിര്‍ക്കുന്നതും വള്ളികളില്‍ മുന്തിരി പൂവിടുന്നതും വിടരുന്നതുമായ സ്വപ്നം യാഥാര്‍ഥ്യമായതിന്‍റെ സന്തോഷത്തിലാണ് രോഷ്നിയും കുടുംബവും. മുന്തിരിത്തോട്ടം കാണാന്‍ ധാരാളം ആളുകളും എത്താറുണ്ട്.

 NEWS DEEPIKA

നെല്‍വയല്‍ -തണ്ണീര്‍ത്തട സംരക്ഷണനിയമപ്രകാരം പാവറട്ടി ഗ്രാമപ്പഞ്ചായത്തില്‍ കരട് ഡാറ്റാബാങ്ക് പ്രസിദ്ധീകരിക്കും. സ്ഥലം സംബന്ധിച്ച് പരാതികളോ അപേക്ഷകളോ ഉണ്ടെങ്കില്‍ 25നു മുമ്പ് കൃഷിഭവനില്‍ സ്ഥലവിവരങ്ങളുടെ രേഖകള്‍ സമര്‍പ്പിക്കണം.

ജൈവപച്ചക്കറി കൃഷിയിലേക്ക്പുതിയ തലമുറയെ ആകര്‍ഷിക്കുന്നതിന്‍റെ ഭാഗമായി  സെന്‍റ് ജോസഫ്സ് എല്‍പി സ്കൂളിലെ വിദ്യാര്‍ഥികള്‍ പച്ചക്കറി കൃഷിക്ക് തുടക്കം കുറിച്ചു. പാവറട്ടി സെന്‍റ് ജോസഫ്സ് തീര്‍ഥകേന്ദ്രത്തിനു മുന്നിലുള്ള പത്ത് സെന്‍റ് സ്ഥലത്താണ് ജൈവപച്ചക്കറി കൃഷി നടപ്പിലാക്കുന്നത്. പിഞ്ചു കുട്ടികള്‍ക്ക് പിന്തുണയുമായി അധ്യാപകരും രക്ഷിതാക്കളും ഒപ്പമുണ്ട്. പ്ലാസിറ്റിക് മള്‍ച്ചറിംഗ് നടത്തിയാണ് പച്ചക്കറി കൃഷി ആരംഭിച്ചിട്ടുള്ളത്.

പച്ചക്കറി ചെടികള്‍ക്കാവശ്യമായ വെള്ളവും വളവും കൃത്യമായ ആളില്‍ ഡ്രിപ് ഇറിഗേഷന്‍ വഴി ഓരോ ചെടിയുടെയും കടയിലേക്ക് എത്തും. മത്തന്‍, പയര്‍, വെള്ളരി, വഴുതന, വെണ്ട, മുളക് തുടങ്ങിയവയാണ് കൃഷി ചെയ്യുന്നത്. അധ്യാപകരുടെയും രക്ഷിതാക്കളുടെയും നേതൃത്വത്തില്‍ വിദ്യാര്‍ഥികളെ വിവിധ ഗ്രൂപ്പുകളിലായ തിരിച്ചാണ് പച്ചക്കറി പരിപാലനം നടത്തുന്നത്.

പാവറട്ടി ഗ്രാമപഞ്ചായത്ത് പ്രസിഡന്‍റ് എന്‍.പി. ഖാദര്‍മോന്‍ ജൈവപച്ചക്കറി കൃഷിയുടെ ഉദ്ഘാടനം നിര്‍വഹിച്ചു. സ്കൂള്‍ മാനേജര്‍ ഫാ. ജോണ്‍സണ്‍ അരിമ്പൂര്‍ യോഗത്തില്‍ അധ്യക്ഷനായിരുന്നു. കൃഷി ഓഫീസര്‍ കെ. ബിന്ദു, ബിആര്‍സി കോ-ഓര്‍ഡിനേറ്റര്‍ ബെസി ജോര്‍ജ്, പിടിഎ പ്രസിഡന്‍റ് ബൈജു ലൂവീസ്, പ്രധാന അധ്യാപകന്‍ കെ.ജെ. ബാബു തുടങ്ങിയവര്‍ സംസാരിച്ചു.

ജൈവ വൈവിധ്യ ദിനാചരണത്തിന്റെ ഭാഗമായി കാളമന കായൽക്കടവിൽ കണ്ടൽച്ചെടികൾ നട്ട് ഒരുമനയൂർ ഇസ്‌ലാമിക് വൊക്കേഷനൽ ഹയർ സെക്കൻഡറി സ്കൂളിലെ എൻഎസ്എസ് വിദ്യാർഥികൾ. പ്രിൻസിപ്പൽ എം.പത്മജ, ടി.എൻ.സതീഷ്കുമാർ, എൻഎസ്എസ് പ്രോഗ്രാം ഓഫിസർ നിഷ ഫ്രാൻസിസ്, രാഹുൽകുമാർ, എൻഎസ്എസ് വൊളന്റിയേഴ്സായ വിജീഷ്, നൗഫൽ, മുഹ്‌സിൻ എന്നിവർ നേതൃത്വം നൽകി."

മേല്‍ത്തരം കുറിയ ഇനം തെങ്ങിന്‍തൈകള്‍ ആവശ്യമുള്ള പാവറട്ടി പഞ്ചായത്തിലുള്‍പ്പെട്ടവര്‍ 14നുള്ളില്‍ തുക അടച്ച് പേര് കൃഷിഭവനില്‍ രജിസ്റ്റര്‍ ചെയ്യണം.

മട്ടുപ്പാവിൽ പച്ചക്കറികൃഷിയുടെ വിസ്മയം തീർക്കുകയാണു പാവറട്ടി സ്വദേശി വെള്ളറ ബാബുരാജും കുടുംബവും. 

ബ്ലാങ്ങാട്ട് ഫിഷറീസ് സ്കൂളിലെ അധ്യാപകനായ ബാബുരാജിന്റെ വീടിന്റെ ടെറസിൽ കൂർക്ക, മരച്ചീനി, മാതളനാരങ്ങ, മുരിങ്ങ, കറിവേപ്പ്, കുക്കുമ്പർ, പപ്പായ, കുറ്റികുരുമുളക് തുടങ്ങിയവ കൃഷി ചെയ്യുന്നു. ടെറസിനു മുകളിൽ അര അടി ഉയരത്തിൽ മണ്ണിട്ടാണ് മരച്ചീനി കൃഷി ചെയ്യുന്നത്. മറ്റു കൃഷികളെല്ലാം ഗ്രോബാഗുകളിലാണ്.

ചാണകപ്പൊടിയും ഗോമൂത്രവും മാത്രമാണു വളമായി നൽകുന്നത്. സ്കൂളിൽ പോകുന്നതിനു മുൻപും സ്കൂളിൽനിന്നു തിരിച്ചെത്തിയതിനുശേഷവും ഓരോ മണിക്കൂർ വീതമാണു കൃഷി പരിപാലനം. കൃഷിഭവന്റെ സഹകരണത്തോടെയാണു കൃഷി.  മട്ടുപ്പാവ് കൃഷിക്ക് പഞ്ചായത് അവാർഡ് മാഷിന് ലഭിച്ചിട്ടുണ്ട്