ecAdemz

പഞ്ചായത്തിലെ നിരോധിക്കപ്പെട്ട സ്ഥലങ്ങളിൽ അനധികൃതമായി മൽസ്യ വിൽപന നടത്തുന്നവരെ ഒഴിപ്പിച്ചു. പഞ്ചായത്തും ആരോഗ്യവകുപ്പും ചേർന്ന് പൊലീസ് സംരക്ഷണത്തോടെയായിരുന്നു നടപടി. മരുതയൂർ കവലയിലും ചിറ്റാട്ടുകര റോഡിലും തട്ടുകളിട്ട് കച്ചവടം നടത്തുന്നവരെയാണ് ഒഴിപ്പിച്ചത്. ഗ്രാമസഭയിലെ പരാതിയെ തുടർന്ന് വഴിയോരക്കച്ചവടക്കാരുടെ മലിനീകരണം സംബന്ധിച്ച് ആരോഗ്യവകുപ്പിനും പരാതി ലഭിച്ചിരുന്നു. പാവറട്ടി സെന്ററിൽ പഞ്ചായത്തിന്റെ മൽസ്യ മാർക്കറ്റ് ഉണ്ട്.

 ഇവിടെ ഉയർന്ന വാടകയും നികുതിയും കൊടുത്ത് ഒരു വിഭാഗം കച്ചവടം നടത്തുമ്പോൾ വാടകയോ നികുതിയോ നൽകാതെ മാർക്കറ്റിനു പുറത്ത് വഴിയോരങ്ങളിൽ കച്ചവടം നടത്തുന്നു എന്ന പരാതിയാണ് നടപടിക്കു വഴി വച്ചത്. മാർക്കറ്റിൽ കച്ചവടം നടത്തുന്നവർക്ക് വരുമാന നഷ്ടം ഉണ്ടാക്കുന്നതായി പരാതിയുണ്ട്. നേരത്തെ പാവറട്ടി സെന്ററിൽ തെക്ക് പുളിഞ്ചേരിപ്പടി, വടക്ക് സംസ്കൃത കോളജ്, കിഴക്ക് കൾച്ചറൽ സെന്റർ, പടിഞ്ഞാറ് സെന്റ് ജോസഫ് റോഡ് അതിർത്തിക്കുള്ളിൽ അനധികൃത മൽസ്യവിൽപന നടത്തുന്നത് പഞ്ചായത്ത് അധികൃതർ നിരോധിച്ചിട്ടുണ്ട്.

മരുതയൂർ സെന്ററിലും സ്ഥിരം സംവിധാനത്തിൽ മൽസ്യ വിൽപന പാടില്ല. അതിർത്തിക്ക് പുറത്ത് സൈക്കിളിലോ ബൈക്കിലോ ചലിക്കുന്ന തള്ള് വണ്ടിയിലോ മൽസ്യ വിൽപന നടത്തുന്നതിൽ തടസമില്ല. ഇത് ലംഘിച്ചവർക്കെതിരെ നേരത്തെ അറിയിപ്പ് നൽകിയാണ് ഇന്നലെ നടപടി സ്വീകരിച്ചത്. .

അതേ സമയം മാർക്കറ്റിലെ ലേല തുക ഉയർന്നതാണെന്നും അതിനാൽ മൽസ്യ മാർക്കറ്റിൽ തരക് സമ്പ്രദായം ഏർപ്പെടുത്തി താഴ്ന്ന വരുമാനക്കാരെയും ഉപജീവനം നടത്താൻ അനുവദിക്കണമെന്നും ആവശ്യമുണ്ട്. മൽസ്യ മാർക്കറ്റിൽ ഇപ്പോൾ ലേലത്തിനെടുത്തവരുടെ സമയ പരിധി കഴിഞ്ഞിരിക്കുകയാണ്. മുറികൾ പുതുതായി ലേലം ചെയ്ത് നൽകിയിട്ടില്ല. മുറികൾ പഞ്ചായത്ത് പൂട്ടി സീൽ ചെയ്തിരിക്കുകയാണ്.

ഇവിടെ പുറത്തിരുന്ന് കച്ചവടം നടത്തുന്നവർ ഇപ്പോൾ അനധികൃത കച്ചവടമാണ് നടത്തുന്നതെന്നും ഇവരുടെ മൽസ്യ മാലിന്യങ്ങൾ കാനയിലേക്ക് ഒഴുക്കുന്നത് ആരോഗ്യ വകുപ്പും പഞ്ചായത്തും കണ്ടില്ലെന്ന് നടിക്കുകയാണെന്നും നടപടി നേരിട്ട വഴിയോര കച്ചവടക്കാർ പറയുന്നു.

പാവറട്ടി ഗ്രാമപ്പഞ്ചായത്തില്‍ പകര്‍ച്ചവ്യാധികളെ പ്രതിരോധിക്കുന്നതിനായി ആരോഗ്യകര്‍മസേന രൂപവത്കരിച്ചു. ഓരോ വാര്‍ഡില്‍നിന്നും ആറ് വളന്റിയര്‍മാര്‍ വീതമാണ് ഉള്ളത്. പ്രതിരോധ പ്രവര്‍ത്തനങ്ങളിലൂടെ പകര്‍ച്ചവ്യാധി വ്യാപനം തടയുകയാണ് ലക്ഷ്യം.
വാര്‍ഡ്തലത്തില്‍ പ്രതിരോധ പ്രവര്‍ത്തനങ്ങള്‍ ആശാ വര്‍ക്കര്‍മാരും കര്‍മസേനാംഗങ്ങളും നടത്തും. ആരോഗ്യകര്‍മസേന രൂപവത്കരണ യോഗം ഗ്രാമപ്പഞ്ചായത്ത് ആരോഗ്യ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ സി.പി. വത്സല ഉദ്ഘാടനം ചെയ്തു. പ്രാഥമികാരോഗ്യകേന്ദ്രം മെഡിക്കല്‍ ഓഫീസര്‍ ഷീല വാസു അധ്യക്ഷത വഹിച്ചു.
മുല്ലശ്ശേരി ആരോഗ്യകേന്ദ്രം മെഡിക്കല്‍ ഓഫീസര്‍ ഡോ. സഞ്ജീവ്, വാര്‍ഡ് മെമ്പര്‍മാരായ എം.ടി. മണികണ്ഠന്‍, ശോഭ രഞ്ജിത്ത്, ഷൈനി ഗിരീഷ്, ജൂനിയര്‍ ഹെല്‍ത്ത് ഇന്‍സ്‌പെക്ടര്‍മാരായ ഷിബു പ്രിയദര്‍ശനന്‍, ബീന നന്ദിനി, സിന്ധു, സുഹറ എന്നിവര്‍ പ്രസംഗിച്ചു.

ജനങ്ങളില്‍ ഭീതിപരത്തി പാവറട്ടി മേഖലയില്‍ ഡെങ്കിപ്പനി പടര്‍ന്നുപിടിക്കുന്നു. പനി ബാധിച്ച് ചികിത്സതേടിയവരില്‍ ഒരാള്‍ക്ക് ഡെങ്കിപ്പനി സ്ഥിരീകരിച്ചു. വെന്‍മേനാട് ആശാരിപ്പടിയില്‍ ഗൃഹനാഥന്‍ ഉള്‍പ്പെടെ മൂന്നു പേരാണ് മുളങ്കുന്നത്തുകാവ് മെഡിക്കല്‍ കോളേജ് ആസ്​പത്രിയില്‍ ചികിത്സയിലുള്ളത്.

ഗൃഹനാഥനാണ് ഡെങ്കിപ്പനി സ്ഥിരീകരിച്ചത്. ബാക്കിയുള്ളവര്‍ക്ക് സാധാരണ പനിയാണെന്നാണ് ആരോഗ്യവിഭാഗം പറയുന്നത്. മനപ്പടിയിലും ഒരു യുവാവ് ചികിത്സതേടിയിരുന്നു. പാവറട്ടി, മനപ്പടി, വെന്‍മേനാട്, ആശാരിപ്പടി തുടങ്ങിയ പ്രദേശങ്ങളിലാണ് പനി പടര്‍ന്നു പിടിക്കുന്നത്. ആരോഗ്യവകുപ്പ് ഉദ്യോഗസ്ഥര്‍, ആശ പ്രവര്‍ത്തകര്‍ എന്നിവരുടെ നേതൃത്വത്തില്‍ കൊതുകുനശീകരണപ്രവര്‍ത്തനങ്ങള്‍ നടത്തുന്നുണ്ട്. കൂത്താടി നശീകരണവും ഇവയെ പുകച്ചുകളയുകയുമാണ് ചെയ്യുന്നത്. ജനം ജാഗ്രത പാലിക്കണമെന്ന് ആരോഗ്യവിഭാഗം അറിയിച്ചു.

ലോക ഹൃദയദിനാചരണത്തിന്‍റെ ഭാഗമായി തൃശൂര്‍ അമല കാര്‍ഡിയാക് സെന്‍ററില്‍ സൗജന്യ പരിശോധനാ ക്യാമ്പിലേക്ക് 19 വരെ പേരു രജിസ്റ്റര്‍ ചെയ്യാം. നാല്പതു വയസിനു മുകളില്‍ പ്രായമുള്ളവര്‍ക്കാ ണ് അവസരം. ഫോണ്‍: 2304061. 

പാവറട്ടി  എളവള്ളിയിൽ കർഷക കൂട്ടായ്മയിൽ കേളി ഓർഗാനിക് വെളിച്ചെണ്ണയുടെ ഉൽപാദനം തുടങ്ങി. മേഖലയിൽ നാളികേര സംഭരണം ശക്തിപ്പെടുത്തുക, മായങ്ങളില്ലാത്ത ഓർഗാനിക് വെളിച്ചെണ്ണ കുറഞ്ഞ വിലയിൽ നാട്ടുകാർക്ക് ലഭ്യമാക്കുക എന്നതാണ് ലക്ഷ്യം. സംരംഭം സി.എൻ.ജയദേവൻ എംപി ഉദ്ഘാടനം ചെയ്തു.

മുരളി പെരുനെല്ലി എംഎൽഎ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്റ് ലതി വേണുഗോപാൽ, പഞ്ചായത്ത് വൈസ് പ്രസിഡന്റ് ടി.സി.മോഹനൻ, ജില്ല പ്രിൻസിപ്പൽ കൃഷി ഓഫിസർ എ.എ.പ്രസാദ്, കൃഷി അസിസ്റ്റന്റ് ഡയറക്ടർ വി.സന്ധ്യ, കൃഷി ഓഫിസർ എസ്.സുജീഷ്, മാതൃക കർഷകൻ കുമാരൻ ഏറത്ത് എന്നിവർ പ്രസംഗിച്ചു. കൃഷി അസിസ്റ്റന്റ് ഡയറക്ടർ കെ.ജെ.ഒനീൽ, ജില്ല വ്യവസായ വികസന അസിസ്റ്റന്റ് ഓഫിസർ ലിനോ ജോൺസൺ എന്നിവർ ക്ലാസെടുത്തു."

"

ഹോട്ടലുകളില്‍ മീന്‍വിഭവങ്ങളുടെ വില പ്രദര്‍ശിപ്പിച്ചില്ലെങ്കില്‍ പിടിവീഴും. വിലക്കയറ്റവും പൂഴ്ത്തിവയ്പും തടയുന്നതിനുള്ള പ്രത്യേക സ്‌ക്വാഡാണ് വിലവിവരപ്പട്ടിക പ്രദര്‍ശിപ്പിക്കാത്ത ഹോട്ടലുകള്‍ക്കെതിരെ നടപടി സ്വീകരിക്കുന്നത്.

തൃശ്ശൂര്‍ നഗരത്തിലെ ശക്തന്‍ ബസ് സ്റ്റാന്‍ഡ്, കെ.എസ്.ആര്‍.ടി.സി. കാന്റീന്‍, പരിസരത്തെ ഹോട്ടലുകള്‍ എന്നിവിടങ്ങളില്‍ സിവില്‍ സ്‌പ്ലൈസ്, റവന്യു, പോലീസ്, അളവുതൂക്ക വകുപ്പുകളുടെ സംയുക്തസ്‌ക്വാഡാണ് വ്യാഴാഴ്ച പരിശോധന നടത്തിയത്.  തലപ്പിള്ളി താലൂക്ക് സ്‌പ്ലൈ ഓഫീസര്‍ ടി. അയ്യപ്പദാസാണ് നേതൃത്വം വഹിച്ചത് .

മീനിന്റെ വില ഓരോ ദിവസവും വ്യത്യസ്തമായിരിക്കും എന്നതിനാലും ഓരോ ഇനം മത്സ്യത്തിനും വെവ്വേറെ വില ആയിരിക്കുമെന്നതിനാലും വില പരസ്യപ്പെടുത്താന്‍ കഴിയില്ലെന്നാണ് ഹോട്ടല്‍ നടത്തിപ്പുകാര്‍ നല്‍കിയ വിശദീകരണം.

എന്നാല്‍, ഇതിന്റെ മറവില്‍ ഉപഭോക്താക്കളില്‍നിന്ന് മീന്‍ വിഭവങ്ങള്‍ക്ക് തോന്നുംപടി വില ഈടാക്കുകയാണ്. വില പ്രദര്‍ശിപ്പിക്കാത്ത ഹോട്ടലുകള്‍ക്കെതിരെ കര്‍ശന നടപടി സ്വീകരിക്കുമെന്ന് സ്‌ക്വാഡ് മുന്നറിയിപ്പ് നല്‍കി.



ഡെപ്യൂട്ടി തഹസില്‍ദാര്‍ കെ.വി. പ്രതാപന്‍, സബ് ഇന്‍സ്‌പെക്ടര്‍ കെ. ജയചന്ദ്രന്‍, റേഷനിങ് ഇന്‍സ്‌പെക്ടര്‍മാരായ എം.എസ്. പോള്‍സണ്‍, കെ.വി. വിനോഷ്, അളവ്തൂക്ക ഇന്‍സ്‌പെക്ടര്‍ പി.ജെ. ജിന്‍സന്‍ എന്നിവരും സംഘത്തിലുണ്ടായിരുന്നു.

മാലിന്യം നിറഞ്ഞ് ഉപയോഗശൂന്യമായി കിടക്കുന്ന കടാംകുളം സൗന്ദര്യവല്‍ക്കരിക്കുന്നു. ജനപ്രതിനികളുടെയും പ്രദേശവാസികളുടെയും നേതൃത്വത്തിലാണ് പാവറട്ടി പഞ്ചായത്ത് അഞ്ചാംവാര്‍ഡിലെ കടാംകുളം സംരക്ഷിക്കുന്നത്.

ആദ്യഘട്ടമെന്ന നിലയില്‍ കുളത്തിനുസമീപം വൃക്ഷതൈകള്‍ നട്ടു. നാട്ടുകാരുടെ നേതൃത്വത്തില്‍ കുളത്തിന് സംരക്ഷണമായി കമ്പിവേലികെട്ടും. കുളത്തില്‍ മാലിന്യം തള്ളുന്നത് പതിവാകുകയും മാലിന്യംകൊണ്ട് പ്രദേശത്തെ റോസ്  ഗാര്‍ഡന്‍ നിവാസികള്‍ ഉള്‍പ്പെടെയുള്ളര്‍ ദുരിതത്തിലാവുകയും ചെയ്തതോടെയാണ് കുളം സൗന്ദര്യവല്‍ക്കരിക്കാന്‍ തീരുമാനിച്ചത്.

സ്വകാര്യ വ്യക്തിയുടെ ഉടമസ്ഥതയിലുള്ള കുളം പഞ്ചാത്ത് ഏറ്റെടുക്കുന്നതിനുള്ള നടപടി മുന്നോട്ടുപോകുകയാണ്. പഞ്ചായത്ത് കുളം ഏറ്റെടുത്ത് നീന്തല്‍കുളം ആക്കുകയാണ് ലക്ഷ്യം. 

ആറാം വാർഡിലെ  പള്ളികുളം സൗന്ദര്യവല്‍ക്കരിക്കാന്‍ പള്ളി തീരുമാനിച്ചി രുന്നു . എന്നാൽ  പ്രവർത്തനങ്ങൾ ഒന്നും  ഇതുവരെ നടന്നിട്ടില്ല 

കോഞ്ചിറ മുത്തിയുടെ എട്ടാമിടം തിരുനാള്‍ ഭക്തി നിര്‍ഭരമായി.തിരുനാളിന്റെ ഭാഗമായി അമല ആസ്​പത്രിയില്‍ മാറാരോഗത്താല്‍ വലയുന്നവര്‍ക്കും അപകടത്തില്‍ പെടുന്നവര്‍ക്കുമായി വിശ്വാസികള്‍ രക്തം ദാനം ചെയ്തു. അമ്പതോളം പേര്‍ രക്തദാനത്തില്‍ പങ്കാളികളായി. തീര്‍ത്ഥകേന്ദ്രത്തില്‍ നടന്ന കുര്‍ബ്ബാനയ്ക്ക് ഫാ. ബാബു അപ്പാടന്‍ കാര്‍മ്മികനായി. വികാരി ഫാ. പോള്‍സണ്‍ പാലത്തിങ്കല്‍, സഹ വികാരി ഫാ. സതീഷ് പറത്തോട്ട് എന്നിവര്‍ സഹകാര്‍മ്മികരായി